Бүгін Қазақстанның төртінші бітімгер ротасы өз Отанынан, бітімгершілік миссиясын орындау үшін Ливанға аттанады. Бұл туралы еліміздің қорғаныс ведомствосында айтылды.
Ливанға 120 бітімгер барады. Олар өткен жылдың қараша айынан бері сол жерде міндетін атқарып жатқан еліміздің үшінші бітімгершілік ротасын алмастырады.
Бұрынғыдай, біздің әскер Үнді бітімгершілік батальонының құрамында болады. Ливанда қазақстандық бітімгерлер халыққа көмек көрсетуге, жергілікті жерді патрульдеуге және бекеттерде кезекшілікке тартылатын болады.
Қазақстан Қорғаныс министрлігі Үнді бітімгершілік батальонының әскери қызметшілері күн сайын кем дегенде 50 тапсырма орындайтынын атап өтті.
Ливанға аттанатын әскери қызметшілер алдында сөз сөйлеген десанттық-шабуылдау әскерлерінің қолбасшысы генерал-майор Қаныш Әбубәкіров бітімгершілік қызметі біздің әскерге баға жетпес тәжірибе беріп, халықаралық әскери ынтымақтастықты дамытуға мүмкіндік беретінін атап өтті.
Сондай-ақ, өз сөзінде генерал-майор қазақстандық бітімгерлерге батылдық пен шыдамдылық тілеп, өз міндеттерін лайықты атқаратындарына сенім білдірді.
