Қазақстан тарапы мемлекеттік шекараны жабуға байланысты Ресейден шыға алмайтын қырғызстандықтар үшін транзиттік дәлізді қамтамасыз етеді. Бұл туралы Мемлекет басшысының баспасөз қызметі хабарлады.
Баспасөз қызметінде атап өткендей, ағымдағы жылдың 17 мамырында Қырғызстан Елшілігі Қазақстанның Сыртқы істер министрлігіне қырғызстандықтар үшін транзиттік дәлізді қамтамасыз ету жөнінде нотаны жіберді.
“18 мамырда Үкімет жанындағы коронавирустың таралуына жол бермеу мәселелері жөніндегі ведомствоаралық комиссияның отырысында Ресей Федерациясының Орынбор облысындағы Қырғыз Республикасының азаматтары үшін Қазақстан Республикасының аумағы бойынша жолаушылар көлігін қамтамасыз ету шартымен байланыссыз транзиттік дәліз беру туралы оң шешім қабылданды”, – деп СІМ хабарлады.
Бүгінгі таңда Қырғызстан көлікті қамтамасыз ету мәселесін қарастыруда. Қазақстан СІМ көрші мемлекетке жан-жақты қолдау көрсетуге уәде берді.
Бұған дейін Орынбор облысында Қазақстанмен шекарада Қырғызстан азаматтары үшін шатырлы қалашық ұйымдастырылды.
Сурет: ru.sputniknews.kz
