Ақтөбеде жергілікті полиция ведомствосының бұрынғы анықтаушысы құжаттарға салғырт қарап, қолдан жасады деген күдікке ілініп, оған қатысты қылмыстық істі қарау бойынша сот отырысы өтті. Бұл туралы nur.kz. ақпарат ресурсы жазады.
Тергеу нұсқасына сәйкес, ішкі істер органдарының бұрынғы қызметкері жоқ куәгерлерден жауап алып, тиісті хаттамалар құрастырған. Кейін қылмыстық істер материалдарын «жоғалтқан».
Мысалы, бұрынғы полицей ойдан шығарылған куәгер қатысқан бау-бақша серіктестігінен құбырларды ұрлау фактісі бойынша қозғалған қылмыстық істі тергеген. Нәтижесінде ұрлыққа қатысты іс материалдары белгісіз жағдайда жоғалып кеткен.
Сот шешімімен Ақтөбе полиция ведомствосының бұрынғы анықтаушысы құжаттарға салғырт қарағаны және қолдан жасағаны үшін кінәлі деп танылып, 3,5 жылға шартты түрде бас бостандығынан айырылды. Оның үстіне ол қоғамға 100 сағат мәжбүрлі еңбек етуі керек.
Сондай-ақ, бұрынғы тәртіп сақшысы еліміздің мемлекеттік және құқық қорғау органдарында қызмет ету құқығынан айырылды.
Сурет: the-village.kz
