Мұнай-сервистік компаниялар көмек көрсету мақсатында, өз есебінен Атырау облысының медициналық мекемелеріне медициналық құрал-жабдықтар сатып алды. Бұл туралы KazService мұнай сервистік компаниялар одағы президиумының басшысы Рашид Жақсылықов мәлімдеді.
Жеке компаниялар өңірдегі коронавирустық инфекцияның таралуымен күреске көмек ретінде өкпені жасанды желдету аппараттарының он жиынтығын сатып алды, олар жақын арада облыстық ауруханаларға таратылатын болады.
Рашид Жақсылықовтың айтуынша, мұнай сервистік компаниялар өңірдегі ауруханаларға медициналық құрал-жабдықтарды сатып алуға 117 миллион теңге немесе 285 мың доллардан астам қаражат жұмсады.
Жақсылықов атап өткендей, өкпені жасанды желдету аппараттары өңірдің медициналық мекемелеріне бөлінгеннен кейін, ауруханаларға дәрігерлерді жаңа жабдықтармен жұмыс істеуге үйрететін мамандар келеді.
Бүгінгі таңда Атырау облысында коронавирус жұқтырудың 9392 жағдайы тіркелді, Республикамызда вирус жұқтырғандардың жалпы саны 75153-ке жетті, ал вирустан емделген адамдар саны 46790.
Сурет: sputniknews.kz
