Алматыда Тәуелсіздік монументінің жанында жеке пикет өтті. Оны тіркелмеген Демократиялық партияның жетекшісі Жанболат Мамай ұйымдастырды.
Наразылық акциясында Мамай парламентті заңсыз екенін айтып, оны таратуға шақырды. Белсендінің айтуынша, Мәжіліс дауыс ұрлау арқылы құрылған.
«Олар саяси реформалар жүргізетіндерін мәлімдеді және саяси өзгерістерге уәде берді. Бірақ бірі де жоқ. Бәрі сол күйінде қалды. Жаңадан сайланған депутаттар сайлаудың заңсыз екенін түсінсін. Оларды ешкім сайлаған жоқ. Халық оларға сенім білдірмеді. Сайлаудағы бұрмалаушылықтардың есебінен билікті басып алу орын алды деп санаймын. Бұл парламент қабылдаған заңдар, шешімдер мен мәлімдемелер заңды болмайды», — деді Мамай.
Пикет басталғаннан кейін біраз уақыт өткен соң, қалалық атқарушы органның өкілдері белсендіге жақындап, іс-шараның заңсыз екенін мәлімдеді, өйткені оны өткізу туралы хабарлама әкімдікке түскен жоқ.
Біздің республикамызда сайлау 10 қаңтарда өтті. Соңғы қорытынды бойынша Nur Otan билік партиясы 71,09%, «Ақ жол» партиясы — 10,95%, Халық партиясы — 9,10%, «Ауыл» партиясы — 5,29%, ал «Адал» партиясы — 3,57% дауыс жинады. Сайлаушылардың белсенділігі 63,3% болды.
Сурет: kaztag.kz
