Еңбек және халықты әлеуметтік қорғау министрі Біржан Нұрымбетов өз қызметкерлерінің жалақысын кешіктіретін кәсіпорындарға 1200-ге жуық ұйғарым беріліп, айыппұл салынғанын мәлімдеді.
«Бүгінгі таңда Қазақстанда жалақы бойынша берешек 1,4 миллиард теңгені құрайды. Ең үлкен қарыз Нұр-сұлтан, Алматы қалалары мен Ақтөбе облысына тиесілі. Қабылданып жатқан шараларды күшейту мақсатында бүгінгі таңда еңбек инспекторларының ұйғарымдарын сот орындаушыларының атқару құжаттарының тізіміне енгізу және жалақыны төлемеу бойынша құқық бұзушылық үшін жұмыс берушілердің әкімшілік жауапкершілігін күшейту мәселесі шешілуде», – деді ол.
Нұрымбетов ағымдағы жылдың басынан бастап Қазақстандағы ең төменгі жалақы бір жарым есеге өскенін атап өтті. Әлеуметтік жауапкершілік аясында 203 мың кәсіпорын өзінің 1,2 миллион қызметкерінің жалақысын көтерді.
Сурет: inbusiness.kz
