Президент Қасым-Жомарт Тоқаев өнеркәсіптік қауіпсіздік саласындағы авариялық-құтқару қызметтерінің жұмысын ретке келтіретін, сондай-ақ қызметте қаза тапқан полицейлердің отбасыларына арналған жәрдемақыны арттыратын заңға қол қойды, деп Tengrinews.kz Ақорда сайтына сілтеме жасай отырып хабарлайды.
“Мемлекет басшысы “Қазақстан Республикасының кейбір заңнамалық актілеріне өнеркәсіптік қауіпсіздік, индустриялық аймақтар, жануарлар дүниесі, ерекше қорғалатын табиғи аумақтар, энергетика, табиғи монополиялар және ішкі істер органдарының қызметкерлеріне тұрғын үй төлемдері мәселелері бойынша өзгерістер мен толықтырулар енгізу туралы” Қазақстан Республикасының Заңына қол қойды”, – делінген хабарламада.
Қазір ІІО қызметкерлеріне тұрғын үйді жалға алғаны үшін өтемақы төленеді. Бұрын ол тұрғын үйді меншікке сатып алуға мүмкіндік бермеді. Жаңа заң бұл қаражатты жалдау ақысын төлеуге де, ипотекалық бағдарламалар шеңберінде тұрғын үйді меншікке сатып алуға да пайдалануға мүмкіндік береді. Сонымен қатар, полиция қызметкері қызметте қайтыс болған жағдайда, оның отбасы ипотека шарты бойынша міндеттемелерді орындағанға дейін бұл төлемдерді алуды жалғастырады.
Сондай-ақ, жаңа заңда қауіпті өндірістік объектідегі авариялар мен инциденттерді тергеп-тексерудің бірыңғай тәртібі белгіленеді, авариялар мен инциденттерді тергеп-тексеру жөніндегі комиссиялардың өкілеттіктері, оларды құру тәртібі, нәтижелерді ресімдеу және тергеп-тексерулер жүргізілгеннен кейін ұйымдардың іс-қимылы нақтыланды.
