Қазақстан Республикасының Президенті Қасым-Жомарт Тоқаев Білім және ғылым министрі Күләш Шамшитдинованы қабылдады,деп хабарлайды президент сайты.
Министр Мемлекет басшысына білім беру мен ғылымды дамытудың мемлекеттік бағдарламасын, оның ішінде мектепке дейінгі, орта, кәсіптік және дуалды білім беруді дамыту бойынша қабылданған шаралар туралы хабардар етті.
Тоқаев үш ауысымда оқытуды жою, жаңа мектептер салу жұмыстарын жүргізу қажеттігін атап өтті, сондай-ақ үш тілді оқытуға кезеңмен көшу туралы мәлімдеді.
Сондай-ақ Шәмшидинова Тоқаевқа техникалық және кәсіптік білім беруді дамыту бойынша жүргізіліп жатқан жұмыстар туралы, ең алдымен бизнесмендер мен оқу орындарының ынтымақтастығын ұйымдастыру туралы айтты. Бұдан басқа, жоғары білім сапасы мен жоғары оқу орындары түлектерінің еңбек нарығының талаптарына сәйкестігі мәселелері қозғалды.
Кездесу қорытындысы бойынша Тоқаев білім беру мәселелерін тұрақты бақылауға алып, мектеп мұғалімдері мен жоғары оқу орындары оқытушыларының есебін азайту, педагог мәртебесін арттыруға бағытталған шараларды қабылдау және қазақ тілінде, ең алдымен гуманитарлық ғылымдар саласында зерттеу жүргізетін қазақстандық ғалымдарды мемлекеттік қолдау бойынша тапсырмалар берді.
Сурет: Акорда
