Біздің республикамыздың өкілдері аса қауіпті жұқпалы аурулардың әкелінуі мен таралуынан Тәуелсіз
Мемлекеттер Достастығы елдерінің аумақтарын санитарлық қорғау мәселелері жөніндегі Үйлестіру кеңесінің онлайн-отырысына қатысты, деп хабарлайды ТМД Атқару комитетінің баспасөз қызметі.
Бейнеконференцияға Ресей Федерациясы, Беларусь, Армения, Қырғыз Республикасы, Молдова және Өзбекстан өкілдері де қосылды.
Онлайн-отырыс барысында Достастық елдерінің сарапшылары ТМД елдеріндегі індетке қатысты қазіргі жағдайды талқылады және онда коронавируспен күресуге бағытталған қабылданып жатқан шараларды қарастырды.
Бейнеконференция аясында қатысушылар Ресейдің Достастық елдеріне гуманитарлық көмек көрсеткен әрекетін жоғары бағалады.
Қазақстан гуманитарлық көмекті Ресей Федерациясының басшылығынан ғана емес, оның қоғамдық ұйымдарынан да алды.
Онлайн кездесудің соңында тараптар эпидемиологиялық жағдай туралы ақпаратпен, сондай-ақ коронавирустық инфекцияны емдеу және алдын алу бойынша ғылыми мәліметтермен алмасуды жалғастыруға шешім қабылдады.
Достастықтың Атқарушы комитетінің ақпаратына сәйкес, осы кеңестің келесі отырысын ағымдағы жылдың қыркүйегінде өткізу туралы шешім қабылданды.
Бүгінгі таңда біздің елімізде COVID- 19 жұқтырудың 96922 жағдайы ресми тіркелді. Сонымен қатар, Қазақстанда коронавирус белгілері бар пневмонияның 11008 жағдайы тіркелді.
Сурет: cis.minsk.by
