Нұрсұлтан Назарбаев Талғат Мұхтаровты Совбездегі бөлім меңгерушісі етіп тағайындады. Бұл туралы Ақорданың баспасөз қызметі хабарлады.
Оның жарлығы бойынша Мұхтаров Қазақстан Қауіпсіздік Кеңесі әскери қауіпсіздік және қорғаныс бөлімінің меңгерушісі болып тағайындалды.
Талғат Мұхтаров Теміртауда туған. Жоғары білімді Бөкетов атындағы Қарағанды мемлекеттік университетінде алды.
Сондай-ақ Ұлттық қорғаныс университеті жанындағы Жоғары академиялық курстарда, сондай-ақ Тұңғыш Президент атындағы Ұлттық қорғаныс университетінде оқыды.
1992 жылы әскери прокуратурада қызметін бастады.
2011 жылға дейін ҰҚК-де аса маңызды істер жөніндегі аға тергеуші, басқарма бастығының орынбасары, басқарма бастығы, ҰҚК департаменті бастығының орынбасары лауазымдарында жұмыс істеді.
2011 жылы ол Қорғаныс Министрлігі кадрлар Департаментінің бастығы қызметін атқарды.
2014 жылы ол Қорғаныс министрінің орынбасары лауазымына тағайындалды. Ал 2016 жылдан бастап Қорғаныс министрлігінің Әдеп жөніндегі уәкілі болды.
Қауіпсіздік Кеңесінің басты міндеті ұлттық мүдделерді қорғаудың негізгі бағыттарын айқындау, ұлттық қауіпсіздікке төнетін қатерлерді анықтау, Қазақстан Республикасының ұлттық қауіпсіздігін қамтамасыз ету жөніндегі әдістерді, сондай-ақ құралдарды таңдау болып табылады.
Сурет: ПРЕСС-СЛУЖБЫ МИНИСТЕРСТВА ОБОРОНЫ РК
