Алматы әкімі Бақытжан Сағынтаев қаланың кәсіпкерлер палатасы Өңірлік кеңесінің онлайн-отырысына қатысты, оның барысында шағын және орта бизнесті дамытудың өзекті мәселелері көтерілді.
Кездесуде карантиндік шектеулер режиміндегі ШОБ субъектілерінің қызметіне қатысты мәселелер көтеріліп, дамудың перспективалық бағыттары, сондай-ақ билік органдарымен өзара іс-қимыл қаралды.
Кеңес барысында Алматы өңірлік кеңесінің төрағасы, «Учет» компаниялар тобының басшысы М.Барышев сөз сөйлеп, тыйым салынған кәсіпорындардың қызметін қайта бастау перспективаларына қатысты мәселелерді айтты.
Сонымен қатар, кездесуге қатысушылар мониторингтік топтардың қызметін, креативті индустрия мен мектепке дейінгі білім беруді дамыту, пандемия кезіндегі туризм, автобус парктерінің жұмысы және басқа да мәселелерді талқылады.
Мегаполис әкімі Б. Сағынтаев барлық айтылған мәселелер қаралатынына сендірді. Оның айтуынша, келесі жылға жоспар құрып, онда мақсаттар мен міндеттерді белгілеу қажет.
Кездесуге сондай-ақ қаланың бас мемлекеттік санитарлық дәрігері Ж.Бекшин, әкімдік басқармаларының басшылары, өңірлік кеңес мүшелері, бизнесмендер және Алматы қаласының кәсіпкерлер палатасының дирекциясы қатысты.
Сурет: forbes.kz
