Сенаторлар Бүгін Президенттің Конституцияны, адам мен азаматтың бостандығы мен құқықтарын қорғауды қамтамасыз етуге, қоғамды топтастыруға, елдің стратегиялық даму бағытын анықтауға қосқан зор үлесін атап өтті.
Парламент Сенатының пленарлық отырысы барысында депутаттар Қасым-Жомарт Тоқаевтың ағымдағы жылдың наурыз айында ант беру кезінде ұсынған ұсынысын қолдап, Қазақстан Республикасының Тұңғыш Президенті – Елбасы Нұрсұлтан Әбішұлы Назарбаевқа “Құрметті сенатор” мәртебесін беру туралы қаулы қабылдады.
“Өздеріңізге белгілі, Мемлекет Басшысы Қасым-Жомарт Тоқаев Қазақстан Республикасы Президентінің Ант беру кезінде Тұңғыш Президент – Елбасы Нұрсұлтан Назарбаевқа “Құрметті сенатор” атағын беру туралы ұсыныс енгізді. Мемлекет басшысының бастамасын қолдай отырып, Сенат Бюросының мүшелері “құрметті сенатор”мәртебесі туралы ережені бекітті. Ережеге сәйкес, мәртебе беру туралы шешім Сенат отырысында қабылданады – деді палата спикері Дариға Назарбаева.
Сенаттың қаулысында былай делінген: “Қазақстан Республикасының Тұңғыш Президенті – Елбасының Қазақстан Республикасының демократиялық, зайырлы, құқықтық және әлеуметтік мемлекет ретінде конституциялық-құқықтық негіздерін қалыптастырудағы, сондай – ақ отандық парламентаризмнің қалыптасуы мен дамуындағы қазақстандық мемлекеттіліктің негізін қалаушы тарихи еңбегін, оның Конституцияны, адам мен азаматтың құқықтары мен бостандықтарын қорғауды және қоғамды топтастыруды қамтамасыз етуге, ел дамуының стратегиялық бағытын айқындауға қосқан зор үлесін мойындай отырып, Қазақстан Республикасы Парламентінің Сенаты қаулы етеді: Қазақстан Республикасының Тұңғыш Президенті – Елбасы Нұрсұлтан Әбішұлы Назарбаевқа “Құрметті сенатор”мәртебесі берілсін.
Естеріңізге сала кетейік, “Құрметті Сенатор” мәртебесі туралы ережеге қатысты мәселе Парламент Сенаты Бюросының отырысы кезінде 27 Мамырда қаралған болатын. Бюро мүшелері өз тарапынан Мемлекет Басшысы Қасым-Жомарт Тоқаевтың Қазақстан Республикасының Тұңғыш Президенті Нұрсұлтан Назарбаевқа “Құрметті Сенатор”мәртебесін беру бастамасын бірауыздан қолдады.
