Палата спикері Дариға Назарбаеваның төрағалығымен өткен Парламент Сенатының пленарлық отырысында депутаттар “бір тараптан Еуразиялық экономикалық одақ пен оған мүше мемлекеттер және екінші тараптан Қытай Халық Республикасы арасындағы сауда-экономикалық ынтымақтастық туралы келісімді ратификациялау туралы”заң қабылдады.
Қазақстан Республикасының Ұлттық экономика министрі Руслан Дәленовтің айтуынша, Келісім Еуразиялық экономикалық одаққа мүше мемлекеттер мен Қытай арасындағы өзара сауданы жақсарту үшін жағдай жасайды.
“Келісім өзара саудадағы баждың күшін жоюды және төмендетуді көздемейді. Келісімнің ережелері өзара сауда кезінде қолданылатын техникалық реттеу рәсімдерін, санитарлық және фитосанитарлық шараларды жеңілдетуге мүмкіндік береді. Сондай-ақ, келісім Кедендік ынтымақтастық, зияткерлік меншік құқығын қорғау мәселелерін қамтиды. Ішкі нарықты қорғау шаралары мен берілетін субсидиялар туралы ақпарат алмасу қарастырылған”, – деді ол.
Сондай-ақ, ведомство басшысы электрондық сауда саласында келісімде тұтынушылардың құқықтарын қорғау, сондай-ақ олардың дербес ақпараттары қарастырылатынын айтты.
“Тараптар өзара сауданы шектеуі мүмкін шаралар туралы алдын ала хабарлама алмасуға келісті. Еуразиялық экономикалық одақ мемлекеттері мен Қытай арасындағы өзара іс-қимылды одан әрі дамытуға серпін беру мақсатында салалық ынтымақтастықты дамытудың негізгі бағыттары көзделген. Бұл ауыл шаруашылығы, энергетика, көлік, өнеркәсіптік кооперация, технологиялар мен инновациялар, қаржы және қоршаған орта. Осы бағыттардағы ынтымақтастықты тереңдету біздің елдеріміздің инновациялық белсенділігін, инвестициялық тартымдылығын және бәсекеге қабілеттілігін арттыруға ықпал етеді”, – деп атап өтті министр.
Осы Келісімге сәйкес Тараптар ұлттық заңнама негізінде сауданы реттеу жөніндегі жоспарланып отырған шаралар туралы мәліметтерді жариялайды. Бұл сұрауларды жіберуге, сондай-ақ консультациялар жүргізуге мүмкіндік береді.
“Қытай Қазақстан үшін негізгі сауда серіктестерінің бірі болып табылатынын ескере отырып, шарттық базаны дамыту екі ел арасындағы сауда-экономикалық ынтымақтастықты нығайтуға мүмкіндік береді. Заң жобасын іске асыру республикалық бюджеттен қаржы бөлуді талап етпейді және теріс әлеуметтік-экономикалық және құқықтық салдарларға әкеп соқпайды”, – деді Дәленов.
