Ресей Сыртқы істер министрі Сергей Лавров коронавирус инфекциясына қарсы ұжым болып әрекет ету керек деп мәлімдеді. Бұл туралы оның баспасөз қызметі жазады.
Мұндай мәлімдемені ол Тәуелсіз Мемлекеттер Достастығына мүше елдердің Сыртқы істер министрлері кеңесінің отырысынан кейін өткен баспасөз мәслихатында жасады.
Лавров ТМД мемлекеттері, соның ішінде Қазақстан, індетпен біріге күресу қажет деген ұстанымды ұстанатынын атап өтті.
“Біз халықаралық деңгейде пандемияның тигізген зардабын бағалауымыз керек. Алайда, дағдарыс барлығы өзара байланысты, өзара тәуелді екенін тағы бір рет көрсетті деген қорытынды жасауға болады”, – деді Сергей Лавров.
Ресей СІМ басшысы жаңа вирусқа қарсы тұру үшін Достастыққа мүше мемлекеттер бірігуі керек, бірлескен шаралар қабылдап, халықаралық қатынастарды құру көзқарастарын бірге іздеуге тиіс екенін атап өтті.
Соңғы мәліметтер бойынша, Қазақстан Республикасында коронавирусты жұқтырудың 5417 оқиғасы ресми түрде тіркелді, ал әлемде олардың саны 4 миллионнан астам.
Сурет: Sputniknew.kz
