Жамбыл облысының әкімі Бердібек Сапарбаевтың «ЕвроХим-Қаратау» кәсіпорнының бас директоры Дмитрий Валышевпен кездесуі өтті. Бұл туралы forbes.kz ақпарат агенттігі жазады.
Кездесу Қаратау фосфорит бассейнінің кен орындарын игеру және минералды тыңайтқыштар шығаратын зауыт құрылысы бойынша жобаны жүзеге асыруды талқылау мақсатында өтті. Бұл іспен Ресей Федерациясындағы минералды тыңайтқыштардың ірі өндірушісі болып табылатын «ЕвроХим» халықаралық минералды-химиялық компаниясы айналысады.
Бүгінгі күні ауқымды жобаның бірінші кезеңі орындалды, атап айтқанда, барлау жүргізіліп, кен орнын игеру басталды, сондай-ақ қуаты жыл сайын 640 мың тонна фосфорит ұнын өндіруге жеткілікті тау-кен кешені салынып, пайдалануға берілді.
Сапарбаевпен кездесу барысында «ЕвроХим-Қаратау» кәсіпорнының бас директоры қазір минералды тыңайтқыштар шығаратын зауыт құрылысын қарастыратынын, жобаның екінші кезеңі жүзеге асырылып жатқанын айтты.
Валышевтің айтуынша, жобаны толығымен іске асыру 2025 жылға жоспарланып отыр. Зауыт салынғаннан кейін, ол жылына кемінде бір миллион тонна минералды тыңайтқыштар мен индустриялық өнімдер шығарады. Өнім еліміздің ішкі нарығына жөнелтіліп, бірқатар елдерге экспортталатын болады.
Дмитрий Валышев бұл мақсатқа «ЕвроХим» минералды-химиялық компаниясы 800 миллион доллар бөлетінін баса атап өтті.
Сурет: inosmi.ru
