ҚР Сыртқы істер министрлігінде ведомство басшысы Бейбіт Атамқұлов пен Қытай Халық Республикасының Қазақстан Республикасындағы Төтенше және өкілетті елшісі Чжан Сяо кездесуі болып өтті. Олар екі елдің халықаралық күн тәртібіндегі ұстанымдарының ұқсастығын атап өтті.
Дипломаттар Қазақстандық ауыл шаруашылығы өнімдерін Қытайдың кең нарығына жылжыту мәселелерін талқылады. Қазіргі уақытта ҚР мен ҚХР арасында, Қазақстандық ауыл шаруашылығы өнімдерін ҚХР-ға экспорттау бойынша 14 үкіметаралық рұқсат беру құжаттарына қол қойылды.
Қазақстан СІМ баспасөз қызметінің хабарлауынша, келіссөздерде сауда саласын кеңейту, құрылымды оңтайландыру және сауда ауқымын ұлғайту, сондай-ақ Қазақстан мен Қытай арасындағы саудадағы жоғары технологиялық өнімдердің үлесін арттыру мәселелерін реттеу арқылы, екіжақты тауар айналымын арттыруға ерекше назар аударылды.
Тараптар екі мемлекет басшыларының бастамасы бойынша іске асырылатын ірі бірлескен инвестициялық жобалардың бірі болып табылатын “Қорғас” шекара маңы ынтымақтастығы халықаралық орталығын одан әрі дамытуды шешті.
Анықтама үшін: Қытай Қазақстандағы сыртқы сауда айналымының жалпы көлеміндегі үлесі 2018 жылы 15,7% -ды құраған, Қазақстанның ең ірі сыртқы сауда серіктестерінің бірі болып қала береді.
