Birge oqy пікірталас алаңында республикамыздың студенттері мен педагогтары үшін цифрландыру бойынша төрт күндік тегін курс өтті. Бұл туралы “Қазақпарат” ақпарат агенттігі жазады.
“Өз әріптестеріңіз үшін сандық тәлімгер бол және біліміңізбен бөлісіңіз!” курсы қашықтықтан білім беруге арналды. Ол екі мыңнан астам студенттер мен мұғалімдерді қамтыды.
Бұл курсты ұйымдастырушы, “Елбасы академиясы” корпоративтік қорының басшысы Әнуар Жанғозин коронавирус індетінің таралуына байланысты елімізде білім беру қашықтық режиміне ауысқанын, осыған байланысты бұл қиын кезеңде мұғалімдерге қолдау көрсетуге бағытталған тегін оқыту идеясы пайда болғанын айтты.
Төрт күндік курс барысында Birge oqy жобасының мамандары қазақстандық педагогтарға сабақты қашықтықтан өткізудің ең тиімді құралдары туралы айтып, оларды қалай пайдалану керектігін көрсетті.
Әнуар Жанғозин осы курстың арқасында біздің педагогтар онлайн-режимде сабақ өткізуге дайын құралдарды алумен бірге, қашықтықтан оқыту әдістемесімен де танысқанын атап өтті.
