Еліміздің қорғаныс ведомствосының басшысы Нұрлан Ермекбаев өткен жылдың маусым айында әскери арсеналда снарядтар жарылған Арыс қаласына жұмыс сапарымен барды. Бұл туралы ҚР Қорғаныс министрлігінің баспасөз қызметі хабарлайды.
Арыс қаласына сапарының басты мақсаты — төтенше жағдай салдарын жою бойынша жүргізіліп жатқан жұмыстарды тексеру.
Арыс қаласына сапары аясында Қорғаныс министрі аумақты аралап, оқ-дәрілердің сақталу жағдайын тексерді және снаряд жарылыстарының салдарын жоюға қатысқан әскери қызметшілермен кездесу өткізді.
Кездесу барысында Нұрлан Ермекбаев әскери қызметкерлерге оқ-дәрілердің жарылмаған фрагменттерін кәдеге жарату жөнінде нақты ұсыныстар берді.
Қорғаныс министрлігі төтенше жағдай салдарын жоюда әскери қызметкерлердің жоғары психологиялық жүктемесіне және денеге түсетін ауыртпалыққа байланысты жиынтық жасақтар тұрақты негізде ауысып тұратынын атап өтті.
Сондай-ақ, қорғаныс ведомствосында қазіргі уақытта оқ-дәрілер жарылыстарының салдарын жоюға 900-ге жуық әскери қызметкер мен 130 арнайы техника жұмылдырылғанын айтты.
Сапар соңында Нұрлан Ермекбаев әскери қызметшілерге қиын әрі қауіпті жұмысы үшін алғыс айтып, жоғары баға берді, сондай-ақ Арыстағы төтенше жағдай салдарын жоюды жалғастырудың маңызды екенін айтты.
Сурет: inform.kz
