Қазақстан Республикасы Қорғаныс министрлігінің басшысы Нұрлан Ермекбаев Ақтөбе гарнизонына жұмыс сапарымен барды. Бұл туралы ҚР қорғаныс ведомствосының баспасөз қызметі хабарлады.
Қазақстан Қорғаныс министрлігінің ақпараты бойынша, Нұрлан Ермекбаев базалар штабын, қоймасын, жедел қызметтегі сарбаздардың казармасын, сондай-ақ Ақтөбе гарнизонының әскери машиналар паркін тексерді.
Гарнизон аумағында әуе қорғаныс күштерінің институты, әскери-техникалық мектеп, әскери госпиталь және медициналық мобильді кешен орналасқан.
Сондай-ақ гарнизонда мотоатқыштар, артиллериялық, танктік және барлау-шабуылдау бөлімшелері орналасқан. Бұл бөлімшелердің негізгі міндеттері мемлекеттік шекараны нығайту, заңсыз әскери құралымдарды жоюға қатысу, арнайы операцияларды орындау және еліміздің егемендігін қорғау болып табылады.
Жұмыс сапарының соңында ҚР Қорғаныс ведомствосының басшысы басымдықты міндеттерді белгілеп, алдағы қызмет бойынша бірқатар тапсырмалар берді.
