Елордалық полиция департаменті Нұр-Сұлтанда карантиндік шаралардың күшейтілуіне байланысты полицейлер күшейтілген қызмет атқару режиміне көшетінін мәлімдеді, деп хабарлайды «ҚазАқпарат» ақпарат агенттігі.
Нұр-Сұлтанның бас санитарлық дәрігерінің қаулысына сәйкес, демалыс күндері, атап айтқанда 19-22 маусым аралығында, қалада сауда-ойын-сауық орталықтарының, сауда үйлерінің, сондай-ақ азық-түлік және азық-түлік емес базарлардың жұмысы тоқтатылады.
Демалыс күндері елордада қаланың тыныс-тіршілігін қамтамасыз ететін кәсіпорындар ғана жұмыс істейтін болады.
Нұр-Сұлтан полиция ведомствосының хабарлауынша, азаматтардың қоғамдық орындарға баруына жол бермеу мақсатында, олар арнайы құрылғылармен және қоршаулармен жабылады.
Сондай-ақ, ішкі істер органдарының қызметкерлері Қазақстан астанасының көшелерін күзетеді және қала тұрғындарының барлық белгіленген талаптарды сақтауын қадағалайды.
Осыған байланысты елордалық полиция өкілдері Нұр-Сұлтан тұрғындарын карантиндік талаптарды бұзушылар республикамыздың заңнамасына сәйкес жауапкершілікке тартылатынын ескертті.
Бүгінгі күні Нұр-Сұлтанда коронавирустық инфекцияны жұқтырудың 3113 жағдайы ресми түрде тіркелді, ал Қазақстан Республикасында олардың жалпы саны 16351-ге жетті.
Сурет: Astana.gov.kz
