Қазақстан астанасының әкімі Алтай Көлгінов Көктал-1 және Көктал-2 тұрғын алаптарына жұмыс сапарымен барып, жергілікті тұрғындармен бірқатар кездесулер өткізді. Бұл туралы Нұр-Сұлтан қаласы әкімінің баспасөз қызметі хабарлады.
Жұмыс сапары барысында қала әкімі Нұрбесік шағын аудан тұрғындарының үйлері пайдалануға берілмегенін және тұрғындарды сумен қамтамасыз ету мәселесі бар екенін білді.
«Біз 2007 жылдан бастап өмір сүріп жатырмыз. Әлі орталық сумен жабдықтау жоқ. Электр қуаты іркіліспен жұмыс істейді, кәріз де жоқ. Жанымызда шағынаудан бар, онда мектеп,балабақшалар барлығы жекеменшік. Көшелерді жарықтандыру жоқ,нөсерлі кәріз де жоқ. Тіпті үйге құжаттарымыз да жоқ, тіркеле алмаймыз», — деді әкімге шағын аудан тұрғындары.
Өз кезегінде астаналық әкім қазіргі уақытта үйлер пайдалануға берілуі үшін жер учаскелерін бөлу бойынша жұмыстар жүргізіліп жатқанын айтты.
Сондай-ақ, қала басшысы орман отырғызу учаскесінің тұрғындарында да сумен қамтамасыз ету мәселесі бар екендігі туралы хабардар етті.
Жұмыс сапарының қорытындысы бойынша елордалық әкім қоғамдық кеңесте тұрғын үй алқабы тұрғындарының мәселелері қаралатынын айтты. Бірде-бір мәселе назардан тыс қалмайды.
