Қазақстанның Үндістандағы төтенше және өкілетті елшісі Ерлан Әлімбаев жұмыс сапарымен осы елдің сауда-қаржы және іскерлік орталығы – Мумбаи қаласына барды. Бұл туралы Қазақстан Республикасы сыртқы саяси ведомствосының баспасөз қызметі хабарлады.
Мумбайға жұмыс сапары аясында Ерлан Әлімбаев Махараштра штатының губернаторы Бхагат Сингх Кошьяримен кездесу өткізді. Келіссөз барысында Қазақстан-Үнді қарым-қатынастарын дамытуға қатысты мәселелер талқыланды.
Қазақстандық дипломат пен Махараштра штатының губернаторы екі ел арасындағы екіжақты сауда-инвестициялық және мәдени-гуманитарлық ынтымақтастықты кеңейту бойынша бірқатар мәселелерді қарастырды.
Сонымен қатар, Қазақстан елшісі өзінің жұмыс сапары кезінде жетекші сауда-өнеркәсіп палатасы, Эксимбанк, Мумбай теңіз порты, Махиндра компаниялар тобы басшылығымен, сондай-ақ бизнес-топ өкілдерімен және әлеуетті инвесторлармен бірқатар екіжақты кездесулер өткізді.
Қазақстан сыртқы істер министрлігінің ақпараты бойынша, жоғарыда аталған кездесулерде Қазақстан мен Үндістан арасындағы өзара іс-қимылды кеңейту мәселелері талқыланды.
