Мәжіліс депутаттары бірінші оқылымда жерді шетелдік компанияларға жалға беруге және сатуға тыйым салатын жер қатынастары мәселелері жөніндегі заң жобасын мақұлдады, деп zakon.kz хабарлайды.
Ауыл шаруашылығы министрі Сапархан Омаров 2016 жылы қабылданған Ауыл шаруашылығы жерлерін шетелдіктерге жалға беруге мораторий 2021 жылғы 31 желтоқсанда аяқталатынын еске салды. Осыған байланысты Президенттің тапсырмасы бойынша тиісті заң жобасы әзірленді.
Бүгінгі күні ұсынылған заң жобасында ауыл шаруашылығы жерлерін шетелдіктерге және шетелдік компанияларға, шетелдік қатысуы бар қазақстандық компанияларға, азаматтығы жоқ адамдарға, шетелдік қатысуы бар ғылыми орталықтарға, сондай-ақ қандастарға беруге толық тыйым салу көзделген. Бұдан басқа, заң жобасында шетелдіктер мен шетелдік қатысуы бар қазақстандық компаниялар бұрын жалға алған ауыл шаруашылығы жерлерінің мерзімін ұзарту мүмкін емес және пайдалану мерзімі аяқталғанға дейін ғана иелігінде болады, — деді министр Мәжілістің жалпы отырысында.
Бұл ретте қандастар жеке қосалқы шаруашылық, бағбандық және саяжай құрылысы үшін жер учаскесін ала алады, бірақ тек Қазақстан азаматтығын алғаннан кейін ғана.
