Еліміздің Орталық сайлау комиссиясының мүшесі Анастасия Щегорцова 30 желтоқсанда Қазақстанда Мәжілістегі депутаттық мандаттар үшін күресетін саяси партиялардың теледебаттары өтетінін мәлімдеді. Бұл туралы ustinka.kz ақпарат агенттігі жазады.
Щегорцова Парламенттің төменгі палатасына сайлау бойынша телевизиялық пікірсайыстар өткізу күні Ортсайлаукомның қаулысымен белгіленгенін атап өтті.
Сонымен қатар, ол мәслихаттарға сайлау бойынша пікірсайысты тиісті аумақтық сайлау комиссиялары ұйымдастыруы тиіс екенін ескертті.
Алдағы сайлауға ресми тіркелген бес партия қатысады. Олар – Nur Otan, “АҚ жол” Демократиялық партиясы, Халық партия, “Ауыл” саяси партиясы және “Адал” партиясы.
Бұған дейін хабарланғандай, 10 желтоқсаннан бастап біздің республикамызда сайлау алдындағы үгіт басталды, ол Конституцияға сәйкес 2021 жылғы 9 қаңтарға дейін жалғасады.
Бұл науқан туралы саясаттанушы Андрей Чеботарев өз ойын білдірді. Оның пікірінше, үгіт-насихат жұмыстарынан ақпараттық кеңістікте белсенді жұмыс істеп жатқан, өздерінің бұқаралық ақпарат құралдары бар және сайлауға қатысуға көптеген үміткерлер ұсынған саяси формациялар ұтады.
