ҚР Ұлттық Банкінің басшысы Ерболат Досаев әлемдік экономикадағы үрдістер туралы айтып берді
«Әлемдік экономика жоғары құбылмалылық пен белгісіздік жағдайында сыртқы күйзелістердің әсерінен дамуын жалғастыруда. Біріншіден, бүгінде коронавирустық пандемияның екінші толқынының дамуы әлемдік экономиканың қалпына келу қарқынын анықтайтын негізгі факторлардың бірі болып табылады. Бірқатар жетекші фармацевтикалық компаниялардың вакциналарды сәтті сынақтан өткізу туралы жағымды жаңалықтарға қарамастан, оның толыққанды өндірісі түпкілікті мақұлдау мен логистикалық мәселелерді шешу үшін ұзақ уақытты қажет етеді», — деді Ерболат Досаев Сенаттың жалпы отырысында.
Оның айтуынша, 2021 жылдың ортасына дейін пандемияның алдын алу әлемдік экономиканың қалпына келуін едәуір тоқтата алатын шектеулерді сақтау және қажет болған жағдайда қатайту арқылы жалғасады.
«Екіншіден, әлемдік тауар нарықтары, әсіресе мұнай нарығы жоғары құбылмалылықты сезінуде. Еуропаның бірқатар ірі елдерінде жаңа локдаундарды енгізу мұнайға сұраныстың қалпына келу қарқынына әсер етеді, нәтижесінде мұнай өндіру сұраныстан асып кетуі мүмкін. Мұнай бағасының серпіні көп жағдайда 2021 жылы өндіру квоталары туралы шешім қабылданатын ОПЕК-тің ағымдағы жылғы 30 қараша-1 желтоқсандағы министрлік кездесуінің қорытындыларына байланысты болады. Үшіншіден, әлемдік экономиканы қалпына келтіру сауда шектеулерін алып тастауға және жеткізу тізбегін қалпына келтіруге байланысты болады», — деп Ұлттық Банк басшысы түйіндеді.
Сурет: nege.kz
