Нұр-Сұлтан полиция ведомствосы қос мониторлы жаңа компьютерлер сатып алуға ниетті. Бұл мақсатқа полиция департаменті 18,7 миллион теңге жұмсауды жоспарлап отыр, деп хабарлайды “ҚазТАГ” ақпарат ресурсы.
Мемлекеттік қызмет көрсету порталында орналастырылған осы тапсырыстың сипаттамасында елордалық полицияға аталған компьютерлердің 50 жиынтығы қажет делінген.
“Тапсырыс беруші – Нұр-Сұлтан қаласының полиция департаменті, атауы – компьютер, қосымша сипаттама – екі мониторлы компьютер, бір данасының бағасы – 375 357,14 теңге, саны – 50 жиынтық, жоспарлы сома – 18 767 857 теңге”, – деп көрсетілген тапсырыс сипаттамасында.
Қос мониторлы компьютерлерді жеткізуге өтінімдерді қабылдау 20 шілдеден басталады және жоспарланып отырғандай, биылғы жылдың 4 тамызына дейін жалғасады.
Бұған дейін елордалық қоршаған ортаны қорғау және табиғатты пайдалану басқармасы Нұр-Сұлтандағы тутұғыр аумағын қалпына келтіріп, абаттандыру үшін 1,4 миллиард теңге жұмсамақ екені хабарланды. Бұл тапсырыс мемлекеттік сатып алу порталында орналастырылған.
