Ребрендингке дейін Қазақстан Коммунистік Халық партиясы болған, қазіргі Халық партиясы фракциясынан сайланған Мәжіліс депутаты Айбек Паяев республикамыздағы жалақы мөлшерін сынға алды.
Халық партиясының өкілі бүгінгі таңда Қазақстан еңбекақы төлеу бойынша 56 мемлекеттің ішіндегі ең төменгілердің бірі болып табылатынын мәлімдеді. Оның айтуынша, бұл туралы Picodi халықаралық қызметінің статистикасы куәландырады.
“Қазақстан – өткен жылмен салыстырғанда сақтандыру жарналарының өсуіне байланысты төмендеген, ең төменгі жалақылы жалғыз ел, бізден кейін тек Нигерия мен Өзбекстан ғана”, – деп атап өтті депутат.
Сондай-ақ Паяев Қазақстанда номиналды ең төменгі жалақы мөлшері 42,5 мың теңге болғанын, ол сол күйінде қалғанын, бірақ сақтандыру жарналарының өсуіне байланысты біздің азаматтарымыздың нақты жалақысы азайып, 37,4 мың теңгені құрағанын атап өтті.
Парламент мүшесінің айтуынша, бұл ешқандай сын көтермейтін жағдай. Осыған байланысты бұрынғы коммунистер партиясынан сайланған Мәжіліс депутаты атқарушы билік басшысы Асқар Маминге жүгініп, елімізде азаматтардың жалақысын арттыру бойынша қандай шаралар қабылданып жатқанын түсіндіруді сұрады.
Сурет: times.kz
