Орталық коммуникациялар қызметінде өткен брифинг барысында Қазақстан Республикасы Денсаулық сақтау министрінің орынбасары Ажар Гиният еліміздің жоғары лауазымды шенеуніктері коронавирустан қандай медициналық мекемелерде емделіп жатқанын айтты, деп хабарлайды zakon.kz ақпарат ресурсы.
Денсаулық сақтау вице-министрінің айтуынша, Қазақстанда мемлекеттік қызметкерлерді емдеуге жатқызудың ерекше тәртібі жоқ. Барлық шенеуніктер аурудың ауырлығына байланысты инфекциялық стационарларда емделуде.
Сонымен қатар, Ажар Гиният мемлекеттік қызметкерлерде коронавирустың жеңіл немесе орташа дәрежесі болса, онда олар үйде емделіп, барлық қажетті процедураларды алып жатқанын атап өтті.
«Ведомстволық ауруханаларда инфекциялық ауруларды емдеу қарастырылмаған, олардың ондай қызметке лицензиясы жоқ. Сондықтан мемлекеттік қызметкерлерге барлық емдеу жалпы негізде жүргізіледі», — деп атап өтті Денсаулық сақтау министрінің орынбасары.
Соңғы мәліметтерге сәйкес, Қазақстан Республикасында коронавирустық инфекцияны жұқтырудың 44075 жағдайы ресми түрде расталды, олардың ең көп саны Алматыда анықталды, атап айтқанда 5902 жағдай.
Бұған дейін мемлекеттік комиссия елімізде екі апталық карантин режимін енгізу туралы шешім қабылдағаны хабарланған болатын.
Сурет: vedomosti.ru
