Бүгін Өзбекстан Республикасына жұмыс сапары аясында Қазақстан Республикасы Премьер-Министрінің орынбасары Ералы Тоғжанов Өзбекстан Республикасының Премьер-Министрі Абдулла Ариповпен кездесті, деп хабарлайды «ҚазАқпарат» ХАА ҚР Премьер-Министрінің ресми сайтына сілтеме жасай отыра.
Келіссөздер барысында денсаулық сақтау, білім және ғылым саласындағы Қазақстан-Өзбекстан ынтымақтастығын нығайту мәселелері талқыланды. Елдердегі қазіргі эпидемиологиялық жағдай туралы пікір алмасылды, COVID-19 жаңа инфекциясына қарсы күрес бойынша қабылданған шараларды іске асырудың маңыздылығы атап өтілді. Эпидемия мен індет жағдайында жедел ден қою және өзара іс-қимыл жасау бойынша бірлескен тиімді шаралар әзірлеу туралы уағдаластыққа қол жеткізілді. Кездесу барысында тараптар жоғары технологиялық көмек көрсету, вакциналық алдын алу, сондай-ақ, санитарлық-эпидемиологиялық салауаттылық, ақпараттық технологияларды, фармацияны енгізу бойынша өзара іс-қимылды жолға қою, оның ішінде фармацевтика өнеркәсібінде кооперациялық жобаларды құруды пысықтау, медициналық денсаулық сақтау мәселелері бойынша қызметтер көрсету және т. б. денсаулық сақтаудың перспективалы салаларындағы ынтымақтастықты жандандыру қажеттілігі туралы ортақ пікірге келді.
Сөйлесу барысында Қазақстан Премьер-Министрінің орынбасары Өзбекстанда қазақстандық жоғары оқу орындарының филиалдарын ашу мүмкіндігін қарастыруды, сондай-ақ екі мемлекеттің президенттік мектептері арасында тәжірибе алмаса бастауды, жалпы білім беру саласындағы ынтымақтастықты жандандыруды ұсынды. Кездесудің қорытындысында Ералы Тоғжанов Өзбекстан Премьер-Министріне қонақжайлылығы үшін ризашылығын білдіріп, өзбек тарапын Қазақстанға жауап сапарымен келуге шақырды.
