ҚР премьер-министрі Асқар Маминнің төрағалығымен өткен Үкімет отырысында Солтүстік Қазақстан облысының 2025 жылға дейінгі әлеуметтік-экономикалық дамуының кешенді жоспары қаралды, деп zakon.kz primeminister.kz сілтеме жасай отырып хабарлайды.
Ұлттық экономика министрі Әсет Ирғалиев, индустрия және инфрақұрылымдық даму министрі Бейбіт Атамқұлов, Ауыл шаруашылығы министрі Сапархан Омаров, сауда және интеграция министрі Бақыт Сұлтанов, Еңбек және халықты әлеуметтік қорғау министрі Серік Шапкенов, Денсаулық сақтау министрі Алексей Цой, білім және ғылым министрі Асхат Аймағамбетов, Солтүстік Қазақстан облысының әкімі Құмар Ақсақалов баяндама жасады.
Мемлекет Басшысы Қасым-Жомарт Тоқаевтың тапсырмасы бойынша Солтүстік Қазақстан облысының әлеуметтік-экономикалық дамуының кешенді жоспары өзектендірілді. Құжат 4 негізгі бағыт бойынша 80-нен астам іс-шараны іске асыруды көздейді: инвестициялық жобалар, тұрғын үй және инфрақұрылым, әлеуметтік сала, қоғамдық құқықтық тәртіпті және азаматтық қорғауды қамтамасыз ету.
Өзектендірілген кешенді жоспардағы инвестициялардың жалпы көлемі шамамен 2 трлн теңгені құрайды, олардың басым бөлігі — жеке инвестициялар. Бұл жаңа жобаларды іске асыруға, сапалы жұмыс орындарын құруға және өңір экономикасының жаңа құрылымын қалыптастыруға мүмкіндік береді.
Алдын ала бағалаулар бойынша Кешенді жоспарды іске асыру өңдеу өнеркәсібі мен ауыл шаруашылығы өнімдері көлемін 1,5 есе ұлғайтуға, жалпы өңірлік өнімнің өсу қарқынын 5,2% — ға дейін қамтамасыз етуге ықпал ететін болады. Жаңа өсу нүктелері пайда болады, Облыстың инфрақұрылымы жақсарады.
АӨК-те 52 сүт-тауар фермасы, 3 бордақылау алаңы, 2 құс фабрикасы, құрама жем зауыты, жылыжай кешені және т. б. салынады.
Өнеркәсіпте CLAAS ауыл шаруашылығы техникасының өндірісін жергіліктендіру, «John Deere» сервис орталығы, «Ақсоран» және «Баян» вольфрам-молибден кендерінің кен орындарын әзірлеу, сондай-ақ тау-кен металлургия комбинатын және «ready-built factory»типі бойынша жаңа өндірістік алаңдар салу көзделеді.
Өңірде «Қызылжар» сауда-логистикалық хабы құрылады.
Елдің әкімшілік орталықтарымен іскерлік белсенділікті дамыту үшін авиарейстер саны айына 16-дан 68-ге дейін ұлғаяды. Туристік әлеуетті күшейту және спортты дамыту мақсатында Имантау-Шалқар курорттық аймағында көпфункционалды туристік кешен, Петропавлда 3 мың орынға арналған спорт сарайы салынады.
Солтүстік қазақстан облысы елді мекендерінің тұрғын үй, инженерлік-коммуникациялық, цифрлық және көлік инфрақұрылымын дамыту жалғасады. Облыстық көпбейінді аурухананың құрылысымен қатар, өңірде 47 медициналық нысанды пайдалануға беру жоспарланып отыр.
16 мектеп және ерекше білім берілуіне қажеттілігі бар балаларға арналған 400 орындық түзету мектеп-интернаты салынады. Назарбаев Университетінің тәжірибесі бойынша жоғары оқу орнын, сондай-ақ академиялық артықшылық орталығын құру жоспарлануда.
Өңір әлеуметтік-экономикалық даму үшін жаңа серпін алады. 26 мың жоғары білікті жұмыс орны құрылады. Халықтың өмір сүру сапасын арттыру өңірдегі көші-қон процестерін тұрақтандыруға және жастар мен мамандар ағынын нығайту үшін қосымша жағдайлар жасауға мүмкіндік береді. Бұған білім беру мен денсаулық сақтау саласының белсенді дамуы ықпал ететін болады, — деді А.Мамин.
Үкімет басшысы Солтүстік Қазақстан облысының 2025 жылға дейінгі әлеуметтік-экономикалық дамуының бекітілген Кешенді жоспарының іс-шараларының уақытылы және сапалы орындалуын қамтамасыз етуді тапсырды.
