Бүгін Алматы қаласының Түрксіб аудандық сотында өткен жылдың желтоқсан айында оңтүстік астанаға жақын маңдағы ұшағы құлаған Bek Air әуекомпаниясына қатысты талап-арыз талқыланды, деп хабарлайды “ҚазАқпарат” ақпарат ресурсы.
Бұл авиатасымалдаушыны сотқа тұтынушылардың құқықтарын қорғау жөніндегі қазақстандық комитет берді, өйткені компания өз клиенттеріне болмаған рейстердің билетінің ақшасын қайтаруға асықпады.
Сотта комитет Bek Air компаниясының 509 клиентінің мүддесін білдірді, олардың билеттер үшін 52 миллион теңгеден астам қарызы болды.
Сот процесіне қатысушылардың алдында сөз сөйлеген судья Әлия Меңлібаева сот талап арызды қанағаттандырғанын, сондықтан әуетасымалдаушы өз клиенттеріне тоқтатылған рейстер билеттері үшін ақшаны қайтаруға міндетті екенін айтты.
“Bek Air АҚ тұтынушының кінәсінсіз тоқтатылған авиарейске бұрын сатып алынған билеттердің толық құнын өтеуге міндетті. Bek Air АҚ-дан тұтынушылар пайдасына авиабилеттер үшін төленген сома өндіріп алынсын”, – деп оқып берді Меңлібаева.
Өткен жылдың 27 желтоқсанында Алматы облысында бортында 93 жолаушы мен 5 экипаж мүшесі бар Bek Air ұшағы апатқа ұшырады. Оқиға салдарынан 12 адам қаза тауып, 60-тан астам адам дене жарақатын алды.
Сурет: sputniknews.kz
