Барлық қазақстандықтар коронавирусқа қарсы вакцинамен тегін қамтамасыз етіледі. Мұндай мәлімдемені Денсаулық сақтау министрлігі басшысының орынбасары Марат Шоранов жасады.
Ол біздің азаматтарымыз тегін медициналық көмектің кепілдік берілген көлемі шеңберінде коронавирусқа қарсы тегін екпе ала алатынын атап өтті. Ол үшін Үкіметтің арнайы резервінен қаражат бөлінетін болады.
Шорановтың айтуынша, қазақстандықтарды вакцинамен қамтамасыз ету үшін, республикалық бюджеттен 50 миллиард теңгеге жуық қаражат бөлінді. Оның ішінде Гамалея атындағы эпидемиология және микробиология ұлттық зерттеу орталығында әзірленген ресейлік “Спутник V” препаратының екі миллион дозасын сатып алуға 14 миллиард теңге қарастырылған.
Денсаулық сақтау министрлігі басшысының орынбасары сәуір-мамырдан бастап коронавирус инфекциясына қарсы вакциналау азаматтардың көбіне қол жетімді болатынын айтты. Сонымен қатар, ол ағымдағы жылдың соңына дейін 6 миллионға жуық қазақстандықты вакциналау жоспарланғанын атап өтті.
Бұған дейін 1 ақпаннан бастап Қазақстанда жаппай вакциналаудың бірінші кезеңі басталатыны, оның шеңберінде COVID-19 вакцинациясын медицина қызметкерлері мен санэпидқызмет қызметкерлері алатыны хабарланған.
Сурет: pravda.com.ua
