Қарағандыда Ресей Федерациясы, Өзбекстан және Қырғызстаннан тауарлар түсетін Қазақстан Республикасындағы тұңғыш Global City көтерме-тарату июлогистикалық орталығы ашылды. Бұл туралы «Қазақпарат» ақпарат агенттігі хабарлады.
Бұл орталықта ауыл шаруашылығы өнімдерін сақтауға, сұрыптауға және сатуға болады. Бұл ретте делдалсыз тікелей жеткізу және сату есебінен Қазақстан азаматтары тауарларды көтерме және бөлшек саудада нарықтық бағадан төмен бағамен сатып ала алады.
Бөлшек сауда үшін осы кешеннің төңірегінде жалпы аумағы 42 мың шаршы метрді құрайтын сауда-ойын-сауық орталығы салынды. Сонымен қатар, ірі көтерме сауда жасаушылар үшін барлық жағдай жасалған.
«Альфарух» ЖШС директоры Игорь Милюков жаңа орталыққа қатысты өз ойын білдірді. Оның айтуынша, көтерме-тарату логистикалық орталығы базасында сауданың барлық спектрлері шоғырланған.
«Артық логистика жоқ, бұл сатып алушылар үшін бағаны төмендетуге мүмкіндік береді және кәсіпкерлер бизнесін тиімді етеді. Сондай-ақ, бізде «Магнум» және «Сулпак» желілері де ұсынылатын болады», — деді Милюков.
Көтерме-тарату логистикалық орталығының жалпы ауданы 60 гектарды құрайды. Алдағы уақытта оның аумағын 100 гектарға дейін кеңейтіп, жаңа инфрақұрылымдық нысандар салу жоспарлануда.
