Қазақстан Ұлттық банкінде ақша-несие саясаты жөніндегі Комитет құрылды, деп ҰБ баспасөз қызметі хабарлайды.
Хабарламада ағымдағы жылдың 21 қаңтарында Мемлекет басшысының 2020 жылғы 1 қыркүйектегі Қазақстан халқына Жолдауы шеңберіндегі тапсырмасына сәйкес Ұлттық банкте ақша-несие саясаты жөніндегі комитет құрылғаны айтылған.
Бұл комитет Ұлттық Банктің Басқармасы мен Директорлар кеңесімен қатар жұмыс істеп жүрген қызметкерлер қатарынан тұратын үшінші орган болады.
Ақша-несие саясаты жөніндегі Комитеттің құзыретіне базалық мөлшерлеме бойынша шешімдер қабылдау, ақша-несие саясатының негізгі операциялары бойынша сыйақы мөлшерлемелерін белгілеу және Ұлттық Банк Басқармасының айрықша құзыретіне жатпайтын ақша-несие саясатының өзге де мәселелері бойынша шешімдер қабылдау кіреді.
Орта мерзімді перспективада комитет құрамына макроэкономика мен монетарлық саясатта мамандандырылған және мол тәжірибесі бар тәуелсіз мүшелер кіреді.
Ақша-несие саясаты жөніндегі комитетті құру инфляцияны таргеттейтін елдердің үздік тәжірибесіне сәйкес келеді және ақша-несие саясаты бойынша қабылданатын шешімдердің тиімділігі мен транспаренттілігін арттыруға мүмкіндік береді, деп нақтылады Қазақстан Ұлттық Банкінің баспасөз қызметінен.
Естеріңізге сала кетейік, 2019 жылдың мамыр айында Ұлттық Банк қайта құрылатыны белгілі болды. Нәтижесінде банктің Қазақстандағы қайта құрылуынан кейін ҚР Қаржы нарығын реттеу және дамыту агенттігі құрылды.
Өткен жылдың жазында еліміздің бас қаржы реттеушісі Алматыдан Нұр-сұлтанға көшті.
Сурет: nur.kz
