Мемлекеттік қызметшілердің жаппай қысқаруы жұмыссыздықтың өсуіне әкелмейді. Бұл туралы ҚР Президенті жанындағы Мемлекеттік басқару академиясының бірінші вице-ректоры Еркін Дүсіпов Facebook-тегі “ANTIKOR ORTALYGY” алаңындағы онлайн диалог барысында мәлімдеді, бұл туралы ҚазАқпарат хабарлайды.
“Мемлекеттік қызметшілердің жаппай қысқаруы жаппай жұмыссыздыққа әкеледі деп айта алмаймын. Себебі біз бұл саясатты ұзақ уақыт бойы жүргізіп келеміз. Бүгінде елімізде 90 мыңнан астам мемлекеттік қызметші бар. Қысқарту жағдайында біз оларды бірден жұмыстан шығармаймыз, барлығы заң аясында жүзеге асырылады. Қысқартуға түскен маман үшін мемлекеттік немесе квазимемлекеттік ұйымдарда жұмыс істеуге болады. Жалпы, мемлекеттік басқару саласында осындай реформаларды жүргізу – уақыт талабы мен Президенттің тапсырмасы”, – деді Еркін Дүсіпов.
Оның айтуынша, мемлекеттік қызметкерлерді қысқарту пилоттық жоба ретінде еліміздің бірқатар өңірлері мен мемлекеттік органдарында жүргізіледі.
“Пилоттық жоба ретінде мемлекеттік қызметшілер санын қысқарту Нұр-сұлтан, Алматы қалаларында және Маңғыстау облысының әкімдігінде жүргізілуде. Сонымен қатар, ол Әділет министрлігі мен бұрынғы Мемлекеттік қызмет істері және сыбайлас жемқорлыққа қарсы іс-қимыл агенттігі бір орган болған кезде жүргізілді. Қазіргі уақытта мемлекеттік қызметкерлер санын қысқарту бойынша жоба сегіз мемлекеттік органда жүзеге асырылуда”, – деп атап өтті академия вице-ректоры.
Естеріңізге сала кетейік, Мемлекет Басшысы Қасым-Жомарт Тоқаев Қазақстан халқына Жолдауында мемлекеттік аппарат пен квазимемлекеттік сектор қызметкерлерін қысқартуды жеделдетуді тапсырды.
