Қазақстан Республикасы Білім және ғылым министрлігінің басшысы Асхат Аймағамбетов қазақстандық жоғары оқу орындары оқытушыларының жалақысын арттыруды тапсырды.
Білім министрі атап өткендей, мемлекет басшысы Қасым-Жомарт Тоқаев білім беру сапасын күшейтуді және педагогтарға қолдау көрсетуді тапсырды.
«Осыған орай, біздің министрліктің ведомствоға қарасты мемлекеттік жоғары оқу орындарының ректорлары алдында қоятын бірінші кезектегі міндеті — оқытушылар үшін 30%-дан 50%-ға дейін жалақы көтеру. Орындау мерзімі — 2020 жылғы 10 қаңтарға дейін. Бұл шешімнің нақты негізі бар: қаржы резервтерінің бар екенін көрсеткен жоғары оқу орындарының бюджеттеріне талдау жүргізілді, олардың есебінен еңбекақы төлеу қорын арттыруға болады», — деді министр.
Сонымен қатар, Аймағамбетов педагогтардың ағымдағы жалақысы бойынша, білім сапасын арттыруды талап ету мүмкін емес екендігін түсіндірді. Осыған байланысты еңбек ақыларын арттыру туралы шешім қабылданды.
«Сонымен қатар, ректорлардың алдына мемлекеттік жоғары оқу орындарында жұмыс істейтін академиктерді арнайы қосымша ақы арқылы қолдау міндеті қойылды. Жоғары оқу орындарында академиктер көп емес, сондықтан біз тек біздің ғылыми элитаны қолдауға міндеттіміз. Бұл шаралар мемлекеттік бюджеттен қосымша қаражат пен өзге де күш-жігерді қажет етпейді. Жеке сұрақ — жас ғалымдарды мақсатты қолдау. Болашақта отандық ғылымды дамытуға бағытталған жас ғалымдарды қолдау бойынша қаржылық механизмді әзірлеу бойынша шаралар қабылданатын болады», — деді білім министрі.
