Қазақстан премьер-министрі Асқар Маминнің басшылығымен өткен Үкімет отырысында еліміздің басшысы Қасым-Жомарт Тоқаевтың тапсырмаларын орындау бойынша шаралар қарастырылды. Бұл туралы Үкімет төрағасының баспасөз қызметі хабарлайды.
Стратегиялық жоспарлау және реформалар агенттігінің басшысы Қайрат Келімбетов пен Ұлттық экономика министрі Әсет Ирғалиев мемлекеттік жоспарлаудың жаңа құрылымы туралы айтты. Бірінші деңгейдегі құжаттар мемлекеттің ұзақ және орта мерзімді кезеңдеріндегі дамуын айқындайтын болады. Екінші деңгейдегі құжаттар өңіраралық және салааралық міндеттер бойынша жүргізілетін даму бағытын айқындайтын болады. Үшінші деңгейдегі құжаттар өңірлердегі мемлекеттік органдар мен квазимемлекеттік ұйымдарды жаңғыртуға бағытталады.
Data Driven Government платформасын енгізу арқылы ауқымды сандандыру мемлекеттік басқару жүйесін оңтайландырудың негізіне айналады. Сонымен қатар, Министрлер Кабинетінің басшысы 8 ақпанға дейін экономиканың сапалы және тұрақты өсуін қамтамасыз етуге бағытталған шұғыл шаралар пакетін енгізуді тапсырды.
«Реформалардың жаңа пакеті қысқа мерзімде экономиканы қалпына келтіруге арналған негізгі саясатты жедел қайта құруды қамтамасыз етуі және тұрақты, сапалы экономикалық өсу траекториясына шығуға жағдай жасауы тиіс», — деп атап өтті Үкімет басшысы.
Сурет: ukirmet.kz
