Қазақстанның Бас прокуратурасы дәрі-дәрмектердің бағасын негізсіз көтеру фактілерін анықтау бойынша жүргізіліп жатқан жұмыстар туралы айтты, деп хабарлайды «ҚазАқпарат» жаңалықтар ресурсы.
Қадағалау органы бұл жұмыс үшін еліміздің барлық өңірлерінде арнайы жұмыс топтары құрылғанын, олардың құрамына Ішкі істер органдарының, экономикалық тергеу қызметінің және тауарлар мен қызметтердің сапасы мен қауіпсіздігін бақылау департаменттерінің қызметкерлері кіргенін еске салды.
Осы топтардың жұмысының нәтижесінде Қазақстан Республикасында пайда табу мақсатында дәрі-дәрмектерді жоғары бағамен сатқан 650 дәріхана анықталды. Бұл әрекеттері үшін олардың басшылары жауапқа тартылды.
Бас прокуратура тексеру іс-шараларының қорытындысы бойынша 694 адам жауапқа тартылып, төрт жүз мыңнан астам дәрі-дәрмек орамасы тәркіленді, олардың жалпы сомасы 700 миллион теңгені құрайды. Бұл бағыттағы жұмыс жалғасуда.
Бұған дейін Алматы прокуратурасы мен экономикалық тергеу департаментінің қызметкерлері оңтүстік астанадан жалған дәрі-дәрмек дайындайтын жасырын цех тапқанын хабарлаған.
Цехтан басқа, күмәнді медициналық дәрі-дәрмектер сақталған қойма табылды. Алматы қадағалау органы мен экономикалық тергеу департаментінің қызметкерлері барлығы жүз тоннадан астам жалған дәрі-дәрмек тәркіледі. Қазіргі уақытта бұл факті бойынша тергеу жүргізілуде.
Сурет: almaty.tv
