42 500 теңге көлемінде әлеуметтік төлем алуға үміткер азаматтар оны электронды әмиянға ала алады. Бұл туралы Еңбек және халықты әлеуметтік қорғау министрлігінің баспасөз қызметі хабарлады.
Ведомствода әлеуметтік көмекті төлеу ережелерінде “электрондық ақша жүйесінің операторы”деген ұғым көрсетілген. Бұл санатқа электрондық ақша жүйесінің жұмысын қамтамасыз ететін төлем ұйымдары кіреді.
Осылайша, пандемия салдарынан жұмысынан айрылған Қазақстан Республикасының тұрғындары өздерінің электрондық әмиянына ақшалай көмек алады.
Министрлікте атап өткендей, электрондық ақша жүйесінің операторлары шектеу шаралары салдарынан жұмысынан айрылған Қазақстан тұрғынына тиесілі электрондық әмиянға қаражаттың түсуінің дұрыстығын қамтамасыз етуге міндетті.
Маусым айында МӘСҚ-дан төлем алған азаматтарға карантиннің ұзартылуына байланысты қосымша ақы автоматты түрде тағайындалады.
Сурет: nur.kz
