Түркістанда біздің республикамыздан, Ресей және Өзбекстаннан келген құқықтанушы ғалымдардың қатысуымен сотқа дейінгі іс жүргізу бойынша халықаралық конференция өтуде. Бұл туралы Түркістан облысы әкімдігінің баспасөз қызметі хабарлады.
Жалпы іс-шараға Қазақстан, Ресей, Өзбекстан және Түркиядан 500-ге жуық заң қызметкерлері, соның ішінде Қазақстан Жоғарғы соты, құқық қорғау ведомствосы, қадағалау органы және сыбайлас жемқорлыққа қарсы іс-қимыл агенттігінің өкілдері жиналды.
Яссауи атындағы Халықаралық Қазақ-Түрік университетінде өтіп жатқан конференцияның басты мақсаты сотқа дейінгі іс жүргізу мен құқық қолдану практикасына байланысты өзекті мәселелерді талқылау болып табылады.
Бұл іс-шараның ерекшелігі оның шеңберінде қатысушылар сотқа дейінгі іс жүргізуде өз тәжірибесімен алмасып, бірыңғай іс жүргізу бастамаларын жүзеге асыру туралы ой бөлісе алуында.
Конференция барысында қатысушылар Қазақстанның сыбайлас жемқорлыққа қарсы қызметі Түркістан департаментінің бастамасымен түсірілген “1424” кинофильмін көріп үлгерді.
Сонымен қатар, іс-шара аясында жас суретшілер арасында сыбайлас жемқорлыққа қарсы мәдениетті қалыптастыру бойынша байқау жеңімпазы сайланды.
Сурет: inform.kz
