Қазақстан президенті Қасым-Жомарт Тоқаев Ресей Федерациясының біздің мемлекеттегі елшісі Алексей Бородавкинмен кездесті. Бұл туралы Ақорданың баспасөз қызметі хабарлады.
Диалог барысында тараптар Қазақстан мен Ресей арасындағы жан-жақты стратегиялық әріптестіктің қазіргі жағдайы мен алдағы перспективаларын талқылады. Тоқаев пен Бородавкин екі мемлекет арасындағы сауда, экономикалық, инвестициялық, мәдени және гуманитарлық өзара іс-қимылды дамытуға ерекше назар аударды.
Қасым-Жомарт Тоқаев коронавирустық инфекция жағдайында ынтымақтастықты екіжақты форматта да, Еуразиялық экономикалық одақ аясында да одан әрі күшейтудің маңыздылығын атап өтті.
Сондай-ақ, тараптар осы жылдың қараша айында өтетін XVII өңіраралық ынтымақтастық форумына дайындықты талқылады. Тоқаев бұл іс-шараны өткізудің сапалы және мазмұнды жоспарын дайындау қажеттігін атап өтті.
Кездесу соңында мемлекет басшысы мен Ресейдің Қазақстандағы елшісі өңірлік және халықаралық күн тәртібіндегі өзекті мәселелерді талқылады.
Сурет: inform.kz
