Қазақстан мен Қырғызстанның ішкі істер министрлері Ерлан Тұрғымбаев пен Ұлан Ниязбеков Алматыда кездесіп, екіжақты ынтымақтастық мәселелерін талқылады және кең ауқымды мәселелер бойынша пікір алмасты, деп хабарлады ҚР ІІМ баспасөз қызметі.
“Кездесу барысында екі елдің полиция ведомстволарының басшылары бірлескен күш-жігерді одан әрі үйлестіру және трансшекаралық ұйымдасқан қылмысқа қарсы күресте ішкі істер органдарының жұмысын жандандыру, ақпарат, оның ішінде жедел, криминалистикалық, құқықтық ақпарат алмасу туралы ниеттерін растады”, – делінген сенбі күнгі хабарламада.
Қырғызстан ІІМ басшысы Қазақстандағы ішкі істер органдарын жаңғырту, оның ішінде полиция қызметін сандандыру, қоғамдық тәртіп пен қауіпсіздікті қамтамасыз етуде халықпен өзара іс-әрекетті, ведомстволық білім беру реформасы мәселелерін жолға қою, сондай-ақ азаматтардың полицияға деген сенімін арттыру және олармен тиімді кері байланыс орнату мәселелеріне ерекше қызығушылық танытты.
“Қазіргі заман талабына сай Қырғызстанда, Қазақстандағы сияқты, сот-құқық жүйесін, оның ішінде ішкі істер органдарын реформалау бойынша жұмыстар жүргізілуде. Бүгінгі кездесу Ішкі істер органдарының қызметін реформалау саласында оң тәжірибе алмасуда табысты болатынына сенімдімін. Біз ынтымақтастықты нығайтуға мүдделіміз және өзара іс-қимылды күшейтуді ұсынамыз”, – деді Ниязбеков.
Жедел-іздестіру қызметі бойынша ынтымақтастық оң нәтижелі екендігі атап өтілді. Өткен жыл және ағымдағы жылдың үш айында Қазақстанда қылмысқа қатысы бар 35-тен астам тұлға анықталды. Қырғызстан милиция қызметкерлері іздеу жарияланған 17 күдіктіні ұстады.
Тұрғымбаев жуырда ғана Алматыда бірлескен арнайы операция нәтижесінде автокөліктер бойынша бірқатар алаяқтыққа қатысы бар ҰҚТ мүшелерінің бірі ұсталғанын хабарлады. Бірқатар тергеу амалдары жүргізілгеннен кейін, ол көрші республикаға экстрадицияланады.
Баспасөз қызметінің мәліметінше, шекара маңы ынтымақтастығы дамып келеді. Алматы және Жамбыл облыстарының аумақтық полиция бөлімшелері көршілес республиканың Ыстықкөл, Шу және Талас облыстарындағы қырғыз әріптестерімен тығыз қарым-қатынаста.
“Екі елдің ішкі істер органдарының ынтымақтастығы жоғары деңгейде. 2015 жылдан бастап үйлестіру жұмыс тобы жұмыс істейді, оның құрамына әкімшілік, криминалдық полиция, көші-қон қызметі және басқа да бөлімшелердің өкілдері кіреді. Біздің мамандар бірлескен операциялар мен іс-шараларды жүргізеді, қылмыстарды бірге зерттейді, қылмыстық топтардың әрекеттерін, есірткі тасымалдауды, заңсыз көші-қон арналарын анықтап, жолын кеседі. Бұл бағыттағы жұмыс тоқтап қалмауы тиіс, өйткені ішкі қауіпсіздік қана емес, жалпы Орталық Азия өңірі де осыған байланысты”, – деп атап өтті Тұрғымбаев.
Тараптар екі елдің полиция ведомстволары қауіпсіздікті қамтамасыз ету және қылмысқа қарсы күрес, оның ішінде оның трансұлттық және ұйымдасқан түрлері бойынша өзара тығыз іс-қимылды жалғастыратынын атап өтті.
