Қазақстанның сыртқы саяси ведомствосының басшысы Бейбіт Атамқұлов Германияға алғашқы ресми сапары аясында Қазақстан-Герман іскерлік дөңгелек үстел өткізді. Бұл туралы ҚР Сыртқы істер министрлігінің баспасөз қызметі хабарлады.
ҚР Сыртқы істер министрлігінің ақпараты бойынша, іскерлік дөңгелек үстелге Герман экономикасы шығыс комитетінің басшылығы мен Германияның 20 ірі компаниясы қатысты.
Дөңгелек үстел барысында оған қатысушылар Қазақстан мен Германия арасындағы машина жасау, агроөнеркәсіптік кешен, мұнай-газ химиясы, құрылыс, көлік және жеңіл өнеркәсіп салаларындағы ынтымақтастық перспективаларын қарастырды.
Қазақстанның сыртқы саяси ведомствосының басшысы Герман бизнесіне «Астана»халықаралық қаржы орталығының бағдарламалары мен жұмысын бірлесіп жүзеге асыруға қатысуды ұсынды.
Келіссөздер барысында «Kazakh Invest «Ұлттық компаниясы» АҚ басқарма басшысының орынбасары Рустам Исатаев еліміздегі Герман компаниялары үшін инвестициялық мүмкіндіктерді қарастырды. Оның айтуынша, қазіргі таңда Германияның бес компаниясымен келіссөздер жүргізіліп жатыр, олар қазақстандық инвестициялық жобаларды жүзеге асыруға мүдделі.
Өз кезегінде герман тарапы біздің еліміздің артықшылықтарының бірі — ЕАЭО, Қытай, Таяу Шығыс, Орталық Азия нарығына шығу екенін атап өтті. Германдықтар еліміздің агроөнеркәсіп кешеніне қызығушылық танытатынын мәлімдеді.
Сонымен қатар, CLAAS KGaA mbH компаниясының бақылау кеңесінің төрағасы қоса атқарушы Герман экономикасы шығыс комитетінің басқарма төрағасының орынбасары Катрина Клаас-Мюльхойзер бүгінгі таңда Қазақстан Германияның Орталық Азиядағы маңызды серіктесі болып табылатынын хабарлады.
Дөңгелек үстел қорытындысы бойынша қатысушылар Қазақстан-Герман инвестициялық ынтымақтастығын дамыту бойынша жол картасын әзірлеуге және бірлескен жобалар тізімін құруға келісті.
