Қазақстан Республикасы Ұлттық Банкі төрағасының орынбасары Әлия Молдабекова сыртқы факторлардың валюта нарығына әсері туралы айтты. Бұл туралы «Қазақпарат» ақпарат агенттігі жазады.
Молдабекова бүгінгі таңда коронавирустық инфекцияның таралуы әлемдік экономика үшін басты қатер болып табылатынын мәлімдеді.
Оның айтуынша, вирустың Қытайдан тыс жерлерде таралуы экономикасы дамып келе жатқан мемлекеттерден капиталдың ішінара кетуіне ықпал етті және сыртқы нарықтағы күйгелектік Қазақстанға да келді
Алайда соңғы айда теңге бағамы шамалы, 0,6%-ға төмендеді. Бұл ақпан айында негізгі салық төлемдері жүзеге асырылатына байланысты. Сондай-ақ, ұлттық валютаны экспорттаушылардың саудасы да қолдады.
Сонымен қатар, Әлия Молдабекова Ұлттық Банктің валюта нарығындағы жағдайды тұрақтандыруға және қаржылық тұрақтылықты қамтамасыз етуге бағытталған шаралары туралы айтты. Атап айтқанда, бұл үшін қаржы реттегіш ақпан айының соңғы күндері валюталық интервенциялар өткізді.
Молдабекова атап өткендей, Қазақстанның Ұлттық Банкі валюта нарығындағы жағдайды тұрақты негізде қадағалап отырады және біздің мемлекетіміздің ұлттық валютасының алыпсатарлық ауытқуының алдын алуға дайын.
Сурет: eadaily.com
