Еңбек және халықты әлеуметтік қорғау министрі Біржан Нұрымбетов елімізде жалақы берешегін өтеу бойынша жүргізіліп жатқан жұмыстар туралы айтты, деп хабарлайды «ҚазАқпарат» ақпарат ресурсы.
Нұрымбетов әлеуметтік әріптестік пен әлеуметтік және еңбек қатынастарын реттеу жөніндегі республикалық үшжақты комиссия қатысушыларының алдында сөйлеген сөзінде, 2020 жылдың басынан бастап бүгінгі күнге дейін, Қазақстанда республиканың 835 кәсіпорнында берешек анықталғанын мәлімдеді. Олардың жалпы сомасы 2,6 миллиард теңгеден асты.
Қабылданған шаралардың арқасында 24 мыңнан астам жұмысшының құқықтары қорғалып, оларға екі жарым миллиард теңгеден астам қаржы төленді. Алайда, атқарылған жұмыстарға қарамастан, Қазақстанда жалақы бойынша берешек әлі де бар. Қазіргі уақытта олардың жалпы көлемі 915 миллион теңге.
Еңбек министрінің айтуынша, ең үлкен берешек Алматы, Қостанай және Түркістан облыстарындағы кәсіпорындарда байқалады.
Сондай-ақ, Нұрымбетов қызметкерлері жалақының не екенін ұмытқан алты отандық кәсіпорын басшыларына қатысты қылмыстық іс қозғалғанын хабарлады.
Қызметкерлерінің жалақысын ұстап отырған бірқатар қазақстандық кәсіпорындарға айыппұл салынды. Олардың жалпы көлемі 68,5 миллион теңгені құрайды.
Нұрымбетов жалақы бойынша берешекті өтеуге қатысты мәселе Еңбек министрлігінің ерекше бақылауында екенін айтты.
Сурет: gazeta.ru
