Алматы әкімі Бақытжан Сағынтаев түсірілімдерді ұйымдастыруда шетелдік және отандық кинокомпанияларға жәрдемдесетін жаңа құрылымның құрылуын жариялады, деп ХАА «ҚазАқпарат» тілшісі хабарлайды.
Әкімнің айтуынша, Алматы кино түсіру және өндіру үшін қолайлы қала болып табылады. Қала жылына орта есеппен 220 күн шуақты ауа-райы сыйлайды. Бес климаттық аймақ, керемет пейзаждар мен дамыған инфрақұрылым кез келген жанрдағы фильмдерді түсіруге мүмкіндік береді: тарихи-фэнтезиден бастап.
«Қазір Алматы мен Алматы облысына әлемдегі танымал клиптерді, жарнама мен деректі фильмдерді түсіру үшін түрлі елдерден келген студиялар келіп жатыр. Барлық қажетті жағдайларды жасау үшін қала әкімдігі жанынан арнайы орган — Almaty Film Commission құрылады. Бұл құрылым «бір терезе» қағидаты бойынша Алматыда да, біздің өңірде де түсірілімдерді ұйымдастыруда шетелдік және отандық кинокомпанияларға жәрдемдесетін болады», — деді Бақытжан Сағынтаев Almaty Investment Forum аясында.
Кинобизнестің, білім мен мемлекеттің тығыз өзара іс-қимылының арқасында біз отандық кинематографты дамытып, Алматыны әлемдік киноның түсіру алаңына айналдыра аламыз, деп атап өтті әкім.
«Бұл біздің қаламыздың имиджін көтеріп қана қоймай, туризмді, сондай-ақ шағын орта бизнесті дамытуға мультипликативті әсер береді. Анимация өндірісіне бөлек тоқталғым келеді. Алматы анимация мектебі кеңес кезеңінде жоғары нәтижелерге жетті. Қазір анимациялық студиялар іс жүзінде жоқ — бұл инвестиция үшін үлкен резерв. Біздің аниматорларымыздың үлкен әлеуеті бар, оны жүзеге асыруға болады және қажет», — деді Бақытжан Сағынтаев.
