Алматы әкімі Бақытжан Сағынтаевтың тапсырмасы бойынша оңтүстік астанада карантиндік шаралардың сақталуын қадағалайтын мониторингтік топтар күшейтілген жұмыс режиміне көшірілді, деп хабарлайды “Қазақпарат” ақпарат агенттігі.
Бүгінгі таңда Алматыда аудандық атқарушы билік органдары қарамағында 24 мониторингтік топ жұмыс істейді, олар қалалық ұйымдар мен нысандарда санитарлық талаптардың сақталуын тұрақты негізде тексереді.
5 шілдеден бастап бүгінгі күнге дейін Оңтүстік Астанада 12 мыңнан астам нысан тексерілді. Тексеру қорытындысы бойынша мониторингтік топ мүшелері үш мыңнан астам бетперде тәртібін бұзуды анықтады.
Анықталған бұзушылықтарға байланысты 698 алматылық нысанның қызметі тоқтатылды.
Сонымен қатар, Алматыда карантин режимін сақтамауға қатысты әкімшілік құқық бұзушылық туралы 3371 хаттама жасалды.
Соңғы мәліметтерге сәйкес, оңтүстік астанада коронавирус инфекциясын жұқтырудың 14072 жағдайы ресми түрде тіркелді, ал Қазақстан Республикасында олардың жалпы саны 104543 құрайды.
