Қазақстандық «ОЛИМП» клиникалық-диагностикалық зертханасында ақылы негізде коронавирусты анықтауға ПТР-тестілеуді өткізу іске қосылды. Бұл туралы «Қазақпарат»хабарлайды.
ПТР әдісімен талдауларды орындауға Атырау, Алматы, Нұр-сұлтан, Көкшетау және Қарағанды қалаларының зертханаларында кірісіп кетті.
«ПТР-тестілеудің арқасында адам ағзасындағы РНК-вирустың болуын диагностикалайды. ПТР-талдау вирустың өзін анықтайды және адамның қазіргі уақытта ауыратынын көрсетеді. Осы себепті коронавирустық инфекцияға диагнозды зертханалық растау үшін талдау қажет. Әрі қарай ПТР-тесттер Қазақстан Республикасының басқа қалаларында қолжетімді болады», — деп түсіндірді клиникада.
Сонымен қатар, зертханада осындай тест тапсыру үшін адамның қалай дайындалуы керектігі туралы ақпарат берілді.
Мұндай зерттеу жүргізу құны 19220 теңге, ал биоматериал алу бағасы-540 теңге.
«ПТР-талдаулар жүргізу үшін барлық үй — жайлар мен жабдықтар мұқият дайындалды, жеке қорғаныс құралдары сатып алынды, зертханашыларға арнайы оқу жүргізілді», — деп қосты клиникада.
ПТР-тесттер және экспресс-тесттер әртүрлі диагностикалық мәнге ие: ПТР-талдау ағзада вирусты анықтайды, ал экспресс-тестілеу көмегімен коронавирустық инфекцияға иммундық жүйенің реакциясын бағалау, сондай-ақ оған антиденелерді анықтау жүргізіледі.
Сурет: lenta.inform.kz
