ҚР Премьер-Министрінің орынбасары Ералы Тоғжанов Жер реформасы жөніндегі комиссияның бесінші отырысын қорытындылады, деп хабарлайды «ҚазАқпарат» ХАА.
«Комиссияның бес отырысы, жұмыс топтарының жеті отырысы өткізілді. Осы қысқа мерзім ішінде 100-ден астам мәселе қаралды. Комиссия отырысының ашық өткенін өздеріңіз көріп отырсыздар. Бірде-бір мәселе жасырылған жоқ, барлығы осында талқыланды. Онлайн-трансляция бүкіл халыққа қолжетімді болды. Комиссияның әрбір мүшесіне сөз сөйлеуге толыққанды мүмкіндік берілді», — деді Ералы Тоғжанов. Үкімет басшысы орынбасарының айтуынша, комиссия отырыстарында барлығы 113 ұсыныс енгізілді. Олардың жиырмасы бойынша нақты шешімдер қабылданды. Комиссия жұмысының қорытындысы бойынша әзірленіп жатқан заң жобасы аясында 28 мәселе бойынша ұсыныстар Парламентке жіберілетін болады. 47 ұсыныс нақты шаралар қабылдау үшін мемлекеттік органдарға жіберілді. «Заңнамада шешімі бар болғандықтан, комиссияның қарауынан 18 мәселе алынып тасталды. Олар жай ғана емес, үш, төрт және тіпті бес сағатқа созылған талқылаудан кейін алынып тасталды. Комиссияның ұсынымдары тұтастай әзірленіп, белгіленген тәртіппен келесі айда Парламентке енгізілетін болады. Комиссияның кейбір мүшелерінің осы заң жобасын Парламент қабырғасында қарау кезінде жұмыс топтарына қатысуға толыққанды мүмкіндігі бар. Мұнда айтылғанның бірде-бірі сөз күйінде қалмайды», — деп сендірді Е.Тоғжанов.
