Президенттің кеңесшісі Ерлан Қарин өзінің YouTube арнасында Сириядан азаматтарды елге қайтару бойынша қазақстандық қызметтердің әрекеттері бейнежазбасын таратты. Кадрда олар негізінен әйелдер мен балалар екені көрінеді.
Қазақстан президенті Қасым-Жомарт Тоқаевтың тапсырмасы бойынша 7-9 мамыр аралығында Сириядан қазақстандықтарды шығару бойынша «Жусан-2» операциясы жүргізілді.
Барлығы 230 қазақстандық азамат, оның ішінде 150-ден астам бала қауіпсіз жерге көшірілді деп хабарланды.
Әскери іс-қимыл кезінде алған жарақатына байланысты бірнеше бала ауыр жағдайда екені айтылады. Құтқарылған 18 баланың ата-анасы жоқ.
Бұл Сириядан қазақстандықтарды құтқару бойынша екінші гуманитарлық операция. Біріншісі осы жылдың басында өткізілді.
Мемлекет басшысы Қазақстан лаңкестікпен күресті жалғастыратынын және қиын жағдайда қалған қазақстандықтарға жан-жақты көмек көрсететінін атап өтті.
Президенттің мәлімдеуінше, гуманитарлық акция жалғасады. Қазақстандықтардың ешқайсысы тағдыр тілкегінде қалмайды.
Сурет: nur.kz
